دق الثواني

وقّفت دق الثواني .. عند ذيك الساعه
ساعةً .. في ظلها منوة خفوق وشفه

ساعةً .. وقفَت عقاربها .. وطوىّ شراعه
صبر قلبً مشتحن .. آيِس ونفّض كفه

لادنت شمسه .. تقبل ضيقته واوجاعه
في خفوقً دون بوحه يمنعه .. ويكفه

كل ليلً يقنعه .. ولا قدر ف اقناعه
ادنى ماهبت نسانيس اشتياق .. ترفه

ليت ساقه .. ما سمع لشوق ولا طاعه
بهذله قد له زمان .. يدفعه ويدفه

يم دار من غلا اهلها تجي منصاعه
لهفته تحكم على العزم القوي.. وتلفّه

ساريً سرآه عينً صابره ملتاعه
في رجاء وصلً علامات المُحال .. تحفّه

ما منع لقيا هوا نفسه .. قصور ذراعه
يمنعه دربً يهيب كل رجّل .. وعفّه

شين قفايه على صوته .. وشين وداعه
لا فهق طرّاف داره .. ما حصلّ له شفّه