لا تسرف فـ ظنك

لا تسرف في ظنك.. وتغلوا هقاويك
بعض الهقاوي للهزايم تجرك

بيض النوايا .. دنستها المحاليك
افطن لها لا تنخدع ثم تغرك

لا تكشف اسرارك وتبدي خوافيك
في غالب الأحيان .. بوحك يضرك

الناس واجد .. لكن الي يصافيك
قلّه .. ونادر من برايه يبرك

سلك.. وسلكها مع الخلق تسليك
لا يتضح خيرك ولا يبان شرك

واطلق حجاجك لا تصرح بما فيك
لو الهموم فوسط صدرك تبرك

احرص ترا ما كل من قال .. وشفيك؟
تستأمن ضلوعه .. وتعطيه سرك