اعد الثواني ..!!

اليوم بكتب من ضميري معاني
ولو طال صمتي ماتناسيت الاحباب

جملة حروف القاف بقصا المحاني
قامت تجول وتنزف الشعر باسهاب

المشكله لاطال صمتي كواني
قمت استحي من كثر ماقول منصاب

بديت احس اني عن الناس ثاني
حتى وانا اكتب هاجسي صرت مرتاب

ياكثر ماعاني واعاني زماني
وياكثر ماحسب قولة افلان كذاب

من شاف عيني ماعجز ماقراني
يقرا خوافي هاجسي بين الاهداب

يقرا الصراحه في عيون(ن)تعاني
نظراتها تكشف عظيمات الاسباب

ياطول صبري في هوى من بلاني
ولو شاب عمري باقي القلب ماشاب

انا عليه اشفق واعد الثواني
ودي بشوفه من ورى لثام واحجاب

ودي اشم العطر واقول يآني
مجنون بك ياكل اهلي والاقراب

هذا هو اللي بس ودي عطاني
يكفيني ماجا منه لو كان بحساب

كل ماتخيل صاحبي لو لفاني
انسى البشر حولي وانا قول ماهاب