الصلّت ابن بسطام - وهاج السلمي

اخر رساله قبل تحديد المصير
كتبتها والله لايسقي حينها

وانا زعول وخاطري ماهو بخير
من كلمةٍ ما قمت في تلحينها

تمر قلبي كل ما هف العصير
وتقلب هدوء الليل من تلوينها

على معاليقي مثل لفح السعير
وكلافة الارواح وش تامينها

حتى المدينه لو من اقصاها تسير
ماعاد تكرم لاجل عينك عينها

وداعتك يانجمة الثلث الاخير
اسرار ماعلمت غيرك وينها

ماعاد سر الناس يدفن وسط بير
البير سمع الناس داخل طينها

واحيان ماتدري وش علاج الضرير
يمكن من العطسه ومن تكوينها

الصّلت ابن بسطام كيف اصبح بصير
من دعوةٍ جاء جيمها يا سينها

والمقتنع ما يحقر الشي اليسير
تعلّمه دنياه عن غاوينها

تغريني الدمعه على وجه الفقير
ما احبها لكن احب اهينها

لاشفت نفسك مالك ب كونك نظير
شوف السماء كم بينك وكم بينها

وان شفت نفسك طير ما تقدر تطير
بعض الطيور وصوفها يا شينها

ما انته ب سالم لو سلم حب الشعير
تحت الرحاه اللي تدق طحينها

© 2023 - موقع الشعر