الثلاث البيض - شباب بن فايح العضياني

راكب اللي تو ورد من قراشه
وارد الفكسار من تالي مديله

أبيضن لونه وداخلته بشاشه
فيه من وصف الذهب حلياً جميله

كن تمثاله اليااقبل كاب باشه
وكن زيكه سلة السيف الصقيله

ماشراه اللي يقاصد من معاشه
الفقير اللي محاصيله قليله

مشتراه من الوكيل بسلم كاشه
طالبه بمواصفاته من وكيله

ينتهض مثل النداوي في انتعاشه
يوم فر دريوله بالترس ويله

كن جلده فالحتيفه واجتواشه
جلد ثعلن في مقاديم المخيله

ثعل ندراً سيلها يسبق رشاشه
هل زخات البرد قدام سيله

منوة اللي مادخل قلبه هشاشه
ماتهمه طرقته لوهي طويله

فوق ركن المرتبه طاون فراشه
وان بغى له طرقتن مانام ليله

يوم نور الصبح باين له غباشه
من عفيف مسرحه والله كفيله

مع طريقن ماتعرض له عكاشه
كن خطه قدم وجهه ينطوي له

يطوي الاميال قدمه طي شاشه
مايهس عن آخر الارقام ميله

وان نزل عن سرعته بالرجل ناشه
كن فوق الارض جنحانن تشيله

ناوياً عقب الصلف والاندهاشه
عند ابو فواز في جده مقيله

شيخنا اللي كل فعل الطيب حاشه
ينحسب به فاللزوم وينعني له

من نصاه تزول عنه هموم جاشه
تنجلي عنه الهموم المستحيله

الشحم والعود الازرق والنعاشه
والقناد اللي يداوى الراس هيله

والشجاعه والبراعه والبشاشه
والمقام اللي محله يستوي له

كل ماجاء موقفن صعبن نقاشه
دون ربعه كل حملن يرتكي له

وان وقف حبل الشقا وازداد طاشه
ياطر الروس الصعاب وترتخي له

لابسن ثوب الشرف مابه عباشه
ناهجن منهاج حامين الدبيله

يوم دقلات السبايا والطناشه
والزناد مولعن راس الفتيله

وردو عمهوج لين اروو عطاشه
في جموع الترك سطواته مهيله

في زمانن ماضي الاسلاف عاشه
خلدو للمجد صفحاتن جليله

والثلاث البيض فازبها عكاشه
ماذكرت من الكثير الا قليله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر