تـبـاريــح (مرثيه)

يالله يا رب الخلايق وربّي
عبدك قضى من دنيته ينهل هْموم

يالله يا ملجاي .. ما فاد طبّي
يزداد همّي كل يوم ٍ ورا يوم .. !!

بنت ٍ بعمْر زْهور جتني .. تخبّي
إحساس طفل ٍ بالحشا .. كان محروم

كانت مثل أختي .. وربّي وربّي
لين اوقضت بعض التباريح بعْلوم .. !!

جتني تسولف عن غرامي وحبّي
وان ّ الهوا في صدرها كان مكتوم .. !!

من صدمتي .. حسّيت ناري تشبّي .. !!
قلت : اسمحي لي .. وش لي بْحبّ مزعوم ؟!

غيرك غلاها بالضمير امْتربّي
عشق ٍ يلوّعني وهالقلب مضيوم

قالت : انا للموت قلب ٍ يلبّي .. !!
حتّى بكى في زهرها كل مشموم .. !!

الوقت دار وْريحها في مهبّي
صار المرض في جسمها يْبيع ويْسوم

والذنب في حسبة ضميري .. لعب بي .. !!
امسى ضميري واصبح يْلوم ويْلوم

واليوم ذا علم ٍ لفاني .. وصبّي
دمع ٍ ذبحني .. واصبح القلب مكلوم .. !!

قالو : توفّت .. قلت : يا عين كبّي
هلّي عليها سيل حزن ٍ من غْيوم

مرحوم يا قلب ٍ توفّى .. مُحبّي
مرحوم يا قلب ٍ بكى الحب .. مرحوم .. !!

موت ٍ قريته .. والحزن ينكتب بي :
( نبكي تجافي قوم .. تبكي جفا قوم )