مرثيه / مناور دهيمش الفداغي الشمري

مرحوم ياللي للجزيلات كسّاب
عود ٍ قضى عمره لكسب الجزيله

هو غاب لكن ذكره اليوم ماغاب
بالطيب / والشيمه / وكسب الجميله

مرحوم ياللي للصعيبات ماهاب
كل ٍ نفض لآ مر ذكره شليله

مشهود له وان جاه محتاج ماخاب
ايده لفعل الخير ماهي بخيله

مدهال للضيفان .. ومشرّع الباب
ومن كل ديره ودار ناس ٍ تجيله

يكفيه علم ٍ به يشيدون الاجناب
واليا انذكر يُذكر مع اهل الفضيله

علمه ينومس كل ربعه والاقراب
وبمثل ابو حوّاس تفخر قبيله

اقفى وعم الحزن اصحاب واحباب
حتى قطر تبكي عليه برحيله

الموت حق وماعن الحق مجناب
عساه بالجنه يلاقي حصيله

والذيب ماخلّف سوا مثله ذياب
حوّاس شيّال الحمول الثقيله

ترفع له البيضا على راس مرقاب
اللي كسب كل الصفات النبيله

ولاهان زامل للجزيلات جلّاب
ذخر الرفيق ان صار بالوقت ميله

ومحمد وغانم هم الكيف لاطاب
مثل السيوف اللامعات الصقيله

احبهم / والحب من الله بلا اسباب
وافخر بكل طيّب وفي قربتي له

يالله يامعطي العطايا بلا حساب
تكفيهم شرور الزمان المهيله

وختامها صلّو على زاك الانساب
اعداد ماتمطر مزونن مخيله