الوقت والناس

الوقت والناس وبراهين واخبار
كل ٍ يجمّع ما كسب باجتهاده

هذاك بالسلوى وهذاك محتار
كل ٍ يحاول يجتهد في مراده

كذاب من قال الزمن يوم غدّار
القلب الاسود هو تخيّر سواده

الناس والغدر وخيانات الاشرار
والكذب والحيله بقوّة إراده

يا كثر اساميهم إذا جيت تختار
وياقل اساميهم بوقت العباده

للخير آذان ٍ وللشر مزمار
والقلب له ما طاب له بانقياده

للآدمي بالوقت لا شك مشوار
تظهر به افعاله ويثمر حصاده

الخوف كل الخوف م تْفيد الاعذار
لا طاح ذنب ٍ يحتضر في مهاده

ما تنفع الدمعه اذا صار ما صار
تضفي على سود الليالي نكاده

الليل عدّا في تناهيت واسرار
واللي ينامه .. كل حلمه .. وساده

لو تنطق الارض بْمرادي والاحجار
كان إتّشكّى الآدمي من فساده !!

حنّا خذلنا الأرض ونقول الاقدار !!
وحروب هذا الوقت أكبر شهاده

حنا جلبنا الذل بالخبث والعار
فينا الطمع أصبح حقيقه وعاده

من لا توقّى طيحته داخل النار
يبشر بحرّ ٍ ما يوالف براده