البارحه ما امسيت والناس ممسين

البارحه ما امسيت والناس ممسين
من هاجسٍ بالصدر ماحدٍ درابه

لاينبدي وابديه شين على شين
ولاينكني همٍ يزيد التهابه

وياما صبرت اسنين واسنين واسنين
صبرا جميل ارجي من الله ثوابه

اصبر على جيراني القرب الادنين
وادرا مشاريه الخوي والقرابه

ماني من اللي رفقته قدر يومين
يومين والثالث تغير جنابه

ومن لايراني راس ما اراه رجلين
ومن لاحسبنا مانحسب حسابه

دايم على كسب النواميس ضارين
يوم انها بين القبايل نهابه

وربعي هل الطالات سابق وذلحين
يوم ان بعض الناس مايقتدا به

ياكم نزلنا دار قوم عزيزين
وياكم شربنا صافيا من شرابه

وكم خايعٍ مهجور بين الحفيفين
نرعاه قبل اللي هقابه رعابه

عاداتنا نقدم على حد الاقصين
نقدم على حد العدا مانهابه

واليا عدي بالبل وحنا مغيبين
وراحت جلايلها محاوي طلابه

نلحق على قبا سوات الشياهين
وكم من عقيدٍ نقطعه من شبابه

هذي فعول اجدادنا والموالين
اخير من سيفٍ سطا في قرابه

تاريخنا معروف حينٍ بعد حين
يوم ان بعض الناس سود كتابه

اما تجاهل سير ناسٍ قديمين
والا هقاله راي ماحدٍ هقابه

وياعايض اسمع من وصاياي ثنتين
دينك على نهج النبي والصحابه

والعلم نور وللبصاير وتحسين
والصدق برهانٍ على كل جابه

وان جا نهارٍ فيه تحصى الموازين
ينجيك عند اللي شديدا عذابه

واخذر تقلد خائن العهد والدين
كم بيت عامر قد سعى في خرابه

ناسٍ على تفريق الاصحاب ضارين
الله لايسمع لهم في استجابه

لاتحسب انا طول الايام حيين
والعمر يرجع مامضى من شبابه

دنيا خذت خير البشر والنبيين
والمسعد اللي بالحياه اهتدى به