سقى الله مزنةٍ هلت تنافس دمعتي بالخير
ولايسقيه من يومٍ غزير الهم هماله

على وعد الندم تنطق حروفي بس هذي غير
كلام وْقاله لساني أموت وْليت ما قاله

عنيد وْراسي اليابس نواه يْصير اكيد يْصير
وانا قلت اخر رساله وصارت آخر رساله

تحريته على بالي ملكت الفكر والتفكير
على بالي فبحر الشوق ينصى القلب و حباله

على بالي يبي يرجع تْجيبه قوة التأثير
ولاقد صار فحسابي يجازي الروح بأفعاله

عناي بْغيبته لا شفت من لا يعْرف التقدير
وقال اش تنتظر قد راح فال الله ولا فاله

وانا من حشرجة صوتي ودمعه عافت التبرير
تبين له وجع قلبٍ تحطم في رجا وْصاله

وربي طاري بْعاده وفقدانه مع التأخير
يفجر شيّ في صدري وْتصبح حالتي حاله

حرام الروح من دونه معاني مالها تفسير
وقلبي إن كان مايدري وجوده صارلي عاله

ويامزنه عجلي هلّي المطر علّ الكلام يطير
عسى يمطر على قلبه يحن ويفتح اقفاله


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر