يالله يامنشي صدوق المخاييل - سهل بن عناد بن مرزوق السكيك

يالله يامنشي صدوق المخاييل
ياعالم فالظاهره والخفيه

ياربي أقبل دعوتي تالي الليل
يوم إن ماغيرك يغفر الخطيه

واكتب لنا من ماقف العسرتسهيل
لامن خلقك قربو للضيه

والطف بنا فالمقفيه والمقابيل
وارفق بنفس دون عطفك رديه

عفت المنام وعفت جلسة هل الهيل
وسهرت حتى شفت نجم الثريه

وفكرت فالدنيا وجبت المعاديل
ولقيتها قفر ٍ ومنا خليه

للقبر ميعاد وللدار تبديل
لاحامت سهوم الفنا والمنيه

لاتعمر الدنيا وقافيك ترحيل
مادامت الدنيا لخير البريه

خذت محمد صفوة الخلق والجيل
الي على الكفار قاد السريه

صفوة قريش الي يبت المصاقيل
وصّى ومنها ماطمع بالجزيه

مادامت الدنيا لجيل بعد جيل
تدرج رحاها بين حين وعشيه

مادامت لموسى ونوح وهل الفيل
ولا دامت لعاد وثمود القويه

دارت بهم لين انجبن المحابيل
وصفا الجناب من القرون العثيه

لاتامن الدنيا بكثر المحاصيل
تراك ماأنت من أهلها باقدميه

خذت شيوخ فالملاقا مشاكيل
وخذت خليل الله وخاتم نبيه

لو للبقا باقين بقو هل النيل
مير البقا لله رب البريه

ويا جاهل اسمع كلمتي والتماثيل
ولياسمعت القول اخذ بالوصيه

وصيّتي مامن وراها مداخيل
عطية مامن وراها جزيه

اوصيك في ثنتين مثل المناهيل
مثل المناهيل القطارالنقيه

يوضي سناهن مثل نور القناديل
واطيب وأعز من النفوس الزكيه

وأخيرمما قيل واللي بعد قيل
اعزم على التقوى بنفس رضيه

دينك ملاذك يوم ويل وتناكيل
فيه النفوس سعيدة ٍ مع شقيه

وجهك وجاهك مع زحول الرياجيل
والقدر عز ٍ مع هل المقدريه

لاصار مالك هيبة تعدل الميل
وترهب عدو طامع فيك نيه

ولانته بحلال الصعب والمحابيل
ونفسك على العدوان ماهي بنيه

ان صرت رجل في لبوس الهماليل
ترا اللبوس ازين على الغشمريه

بنت الرجال اللي هدبها مضاليل
أخير من بعض الوجيه الرديّه

© 2024 - موقع الشعر