الطير والمقناص

واشعاد لو قرّب سهيل وبراده
والقيظ كمّل والخريف امتقفيه

شي على ما قيل سنّه وعاده
وقت يروح وقت ياتي ويتليه

والطير والمقناص ما فيه فاده
آخر زمان الله يعوّض بتاليه

يوم الطرب والطير يعجب هداده
حنا أبلفات الدنانير نشريه

هذا على الشبّه وذا في مهاده
وهذا على وكره نشيله وندعيه

واليوم وسط البيت نرغب اقعاده
الجسم باد وجرد الأيام تطويه

وحتى الشعر غيّر بياضه سواده
وعصر الشباب أقفى وقفت لياليه

وزرع نعم لا بد يأتي حصاده
أما يبس وإلا هله برّقوا فيه

ودنياك ما دامت بخير وسعاده
لو زخرفت له عادة ما تخليه

أحد بما ياتيه رزق ازياده
من غير ما يتعب نصيبه مكفيه

وأحد تباديه بعذاب وقراده
يركض ورا رزق يخمه ويخطيه

تقدير رب له مشيه وراده
عالم عليم ضافيات حسانيه

يعطي ويمنع من يشا من عباده
وكل جعل له باب رزق سعى فيه

يالله تجعل خاتمتنا الشهاده
بجاه الرسول اللي نحبه ونغليه