رد على جلوي التنباوي - سمير بن صليهم

يالله المطلوب يا مجري السفينة
في بحور موجها كبر العماره

داير الأفلاك رب عابدينه
مودع الروض المحل يكثر خضاره

كلنا في حكمته ومطاوعينه
ملتجين برحمته عن حر ناره

عقب ذا نبدي بكلمات سمينه
للذي يفهم معانيه إبجداره

أبو ناصر يوم يشكي عاذرينه
ذايق لوعات غزلان الزباره

والهوى يا صاحبي زينه وشينه
مع عذابه جامع ربح وخساره

عارفه والناس قلبي عارفينه
فاهمين كل عدله وانشطاره

كد دعا حالي مثل حال الهجينه
يوم تم اعسافها عقب الصطاره

من سبايب جادل هرجه رطينه
دارس معناه في فن وشطاره

فاهم يركي على الكبد الغبينه
زين منطوقه ودله واعتباره

العيون عيون فرخ جاذبينه
يوم شاف اللوح صمل في طياره

ضامر السرجوف وردوفه تهينه
سامك عوده مثل عود الزقاره

لا الجسد عاري ولا هي بالضخينه
مثل زملوق نعم في وسط غاره

وأن لبس له زينة من فوق زينه
واختلط صافي بياضه مع حماره

يخلف العشاق عن فكره ودينه
ويتصور له قدم وجهه مناره

له حديث ينعش النفس الحزينه
مع حلا نطقه يجيبه باختصاره

والمولع في هواه مسامحينه
لو تعذله ما يطاوع مستشاره

ذي سلوم الناس من ماضي سنينه
والجدي وسهيل ما خالف مساره

يا عسا الديان ياخذ كل دينه
من يبشرني واسواق إله البشاره

قدم ما الأقدار تقفي بالضغينه
أو تفرق شوفت المسوي وجاره

وأنت قافك يابو ناصر خابرينه
من حلاته در بكر في غظاره

كانك المديون وأنا الثاني ظمينه
باغ أفزع لك إبجهدي وإقتداره

يا رفيق للّوازم ذاخرينه
رفقت الطيب مع الطيب تجاره

والتحيه عد من زار المدينه
أو قصد مكة أبحج واعتماره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر