مات العشم

لـ محمد سراج محمد، ، في الهجاء، 7

مات العشم - محمد سراج محمد

انا غايتو من حمدوك خلاص
جدعت طوبات العشم

وكرهت برهانو والمعاه
ساقونا لاراي لافهم

كجنت جد تاجر الابل
سيد المراح و راعي الغنم

وكباشي داك اصلأ عدو
تصنيفو زي باقى الرمم

معروف عدييل من شب كوز
شارب الحسد وما ليهو دم

وقحاتة الزيف والكضب
رايهم سواد ومتل السجم

قالو السلام قلنا السلام
جبتوه نص عاوزلو تم

لا شفتو وين بترولنا راح
لا قلتو كيف راحت نعم

غلطتنا في العسكر شريك
والصدمة كانت في الأصم

لاجابو حق المات شهيد
لاعرفو عدد الغرقو كم

الثورة اتسرقت نهار
داسوها بالبوت والجزم

والضاع خلاص اصبح سراب
لا حقو لا وين لا سجم

شفتوها يا ناس ثورتى
راحت خلاص صبحت عدم

واتسيد الناس تور جرور
ودانا للزل والعدم

العيش بقينا نقيفلو صف
والجاز عدم والغاز عدم

ياربي كيف نقدر نعيش
ارحمنا من عيشة الغنم

قطعان خراف ساقونا جاي
وكل الكروب وعيشتنا غم

© 2024 - موقع الشعر