دعوه مستجابه - سمير بن صليهم

عديت في راس النبا تقل فزاع
أوكني اللي غاديات اركابه

رجم طويل وعالي يبرح القاع
خال من الاوناس قفر جنابه

اطوح الملواح باع بأثر باع
واصيح وادعي طيرنا اللي غدابه

جثل المناكب لأبرق الريش هلاع
اقفى ورا خرب غدى وانتحابه

حل العصير ومن قدم وجهنا فاع
وأومى عليه اوماية بانقلابه

وعوّدت من راس النبا الوجه منلاع
غير التعب والبرد ما شفت ثابه

الله لا يثري ثرى الطير ليضاع
اثره يضيّق خاطر اللي شقابه

أمس غدى مختار واليوم فرّاع
ماكنها إلا دعوة مستجابه

© 2024 - موقع الشعر