راعي القذله الهله

يا ليت ما جيت راعي القذلة الهلّة
جيته وصار ازيد من الأول التالي

نوار زملوق وسم والمطر علّه
مطغيه عقب الندى شمس الضحى العالي

واشوف في جوهره كل الحلا كلّه
علايم الزين نوره يشعل اشعالي

به سحر هاروت أنا ظني مسولّه
لا رحم جد الغضي للناس قتالي

يا عيد ليجيت مركوز النهد قلّه
غيره من البيض ما يطري على بالي

كانه يبيني فأنا والله ما أملّه
احط له بالحشا مدهل ومنزالي

وإن كان ما هو بيمّي يدمح الزلّة
يمشي بكيفه ويتركني على فالي

بعناية اللي جميع الناس في ظلّه
عليه ستر الولي زين التهنفالي

يا زين أنا افهم طريق الحق وأدلّه
لو طاول الوقت ما ظني تهيالي

حاشوك في عقدة ماهي ابمنحلّه
دونك حجاجير وانت بحبل رجالي

وغديت أنا وأنت مثل اللي على ملّه
يبي الجمالة وهو ما في يده مالي