القيظ راح

القيظ راح وجاك وقت البروده
ما عاد تونس في هواها لواهيب

قام الشتا بسكات يركز عموده
والقيظ شال مصوغات المناسيب

والعد خلي للذيابة تروده
ما حوله الا ناشفات المغاريب

البدو شدوا وأقرشوا من حدوده
وغدا لهم مع صادراته جناديب

يوم عليهم من ليالي سعوده
شوف الفضا وركوب حرش العراقيب

كن الظعاين بالرماه امحدوده
بدو ندي وامسندين ابتغريب

على تهو برق ترزم ارعوده
أقفت بهم حم الذرا شمّخ النيب

واللي يبيهم بيّح الله سدوده
خلوه مثل مصوت ماله مجيب

ما عاد له معهم سبيل يقوده
بدو نحو ماله وراهم مطاليب

يبغوا لهم خد أمغيب حسوده
كد ع ريضانه من الوسم تشعيب

رمثه مشاويل اكبارن افنوده
ما عسفوه أهل الغنم والحواطيب

عشب وغدير وكل يوم بزوده
وصيد وطرب وإشراف روس المراقيب

ذا سلمهم يوم السنين محموده
قدام دور معسكرات اللواليب

دور بعض شيبانا من جنوده
عاشوه فوق امسكرات المصاليب

راحت تواريخه وراحت عهوده
وجيله فنى ما فيه شك ولا ريب

ودنياك لو زانت حسوده حقوده
لازم اتكدّر صافيات المشاريب

ما ينعرف نزلانها من صعوده
لو زخرفت تخفي كبار المضاريب

كم شيخ قوم زاحته من جوده
عقب المعزه شاف ضيم وتعذيب

يالله يا خلاق بيضه وسوده
يا معتني بأرزاق عكف المخاليب

نرجيه من مدات فضله وجوده
أنه يجنبنا عن النار تجنيب

والا كثير المال زوده وفوده
مافك ربه ينطحون المواحيب

قول صحيح وقايله من شهوده
وشكواي للي يعلم السر والغيب

هذا وصلوا عدا ذاري نفوده
على النبي الهاشمي والاصاحيب