ياضامر السر جوف - سمير بن صليهم

يا ضامر السر جوف يا مدمج الساق
يا للي لقلب المولعاني تعوقي

كانك على شوفي مغل ومشتاق
أنا على شوفك تراني شفوقي

لو رحت لو سجيت يا زين الارناق
ما ظنتي عقبك تخايط فتوقي

الله يحاسب واحد للعهد باق
مني ومنكم يا مليح الدقوقي

صحيح أنا ما اجيك لو كان بإرفاق
ولا نيب في حبك سريع طفوقي

لا شك لي مريتك الرجل تنعاق
ونفسي تبي والقلب يمك يتوقي

لك بالحشا بستان واقصور واسواق
وسوق يحرّج به وفيه ألف سوقي

أصد عنك وضامري منك محراق
وازعل واسامح لو تزايد حروقي

اكفخ كما طير على الوكر مشفاق
يبي يطير وقاظبته السبوقي

ما جت لي الدنيا على حسن الأوفاق
حتى معك عيت تحسن أو فوقي

والهقوة أني بطوي ارشاي واتساق
واتبع طريق أهل الهداية بشوقي

واجاز لك واعتاض غيرك بخلاق
خلاق رزاق رحيم شفوقي

من يوم شفت الشيب بالرأس لهاق
والكبر بيّن في مثاني عروقي

لا باغي غيرك ولاني بعشاق
ولا نيب يا ترف الشباب معشوقي

أنا طويت بالهخوى صحف الأوراق
خلصت ما لي في جميع مخلوقي

وصلاة ربي عد ما ناض براق
على نبي بالرسالة صدوق

© 2024 - موقع الشعر