هاذي المنازل

هذي منازل من له القلب يشتاق
اللي له النفس الشقية شفوقه

قامت معالمها تغّير على ساق
وما بان منها نابن الرمل فوقه

ماكن داجت به طويلات الأعناق
شقح البنى خرس العيون الطفوقة

شقح البنات مولعت كل عشاق
اللي لهن في زمة العمر لوقه

عبثات بالمنطوق والقلب مغلاق
وبحر المودة قايسات عموقه

يسبن حشاك ويذبحنّك بالإرماق
بالمزح وإلا زادهن ما تذوقه

راحت لياليهن سريعات وامراق
مثل السحاب اللي هبوبه تسوقه

وياما فقدنا من شريفين الأخلاق
أهل الحمايا والفعول الصدوقه

ربع امشاهدهم ايبشر بالأرزاق
سمحين ذربات الهروج النطوقه

راحوا من الدنيا تفاريد والحاق
أحد ولد وأحد تثنّت اعروقه

وما فات فات ولفته صحف الأوراق
وعندي خبر ما فات عسر إلحوقه

لا شك من فقد الحبابيب والأرفاق
ما ظنتي قلبي تخايط افتوقه

ما طاب لك ما دام لك يابو مشتاق
الوقت يمضي والليالي سبوقه

ودنياك ما دامت على حسن الأوفاق
لو زخرت للمودماني تعوقه

غدارة تبديلك أشكال وأرناق
مثل العميل اللي عميله يبوقه

يعيش فيها اللي كذوب وملاق
خطو المريد اللي أوساع اشدوقه

هماز لماز للأذنين بواق
بالجور والبهتان ياخذ حقوقه

يعيش والطيب على الدرب منعاق
من قل ما عنده ريوقه غبوقه

لو تجلبه ما يشترونه بالأسواق
الصفر غالي والذهب طاح سوقه

وصلاة ربي عد ما لاح براق
على نبي سمّح الله اوفوقه