مقانيص الارياف - سمير بن صليهم

يابو سعد يا شوق منبوز الارداف
عساك تبطي ما تجيك المنيه

تقول لي ذب أول الريش نواف
وأنته مرامك تيتذكر عليه

تبي تذكرني مقانيص الارياف
مع النشامى في فياض عذيه

أيام يوم أن أبرق الريش ينشاف
والطير يدعى كل صبح ومسيه

اليوم عندي عشرة الطير تنعاف
لو كان نفسي في هداده شقيه

أسباب ما له موسم وافي الاطراف
إلا اليا ذعذع براد صفريه

وسهيل جاله مع سنا الصبح رفراف
والبدو شدوا من جناب الركيه

شفنا المزون اللي بها البرق كشاف
نو على نو هواه انعشيه

متعزل ربان مزنه له ارداف
من شاف نوه قال فيه برديه

يبرق ويرعد والمطر فيه هتاف
يا خذ أسبوع ثم يشبع طليه

وحنا تشاورنا عسى ما من خلاف
إما قنصنا الصبح وإلا قفيه

القيظ راح وموسم اقعادنا طاف
والصيد يذكر في حدود الحنيه

© 2024 - موقع الشعر