من هبس انا إيه - احمد الخالدي

إيه اِنِحني توجيب واجلال واكبار
يا قافي اللي تعطي الحقّ راعيه

للشاعر اللي ما على ابياته غبار
جزل وعذب أوله يا لين تاليه

الشاعر الفتاك صفوة هل الكار
من طيب راسه حارم القاف يعصيه

ما له شبيه الاه في كل الاقطار
ولا غيّرت صكات بقعا مباديه

"أكبر من التكريم في سِلم الادوار"
من قو باسه يرعب الجّن طاريه

يرقا سنود ومحتزم عزم واصرار
لو قلت مهما قلت لا شك م اوفيه

دون الخوي يدحم ولا يهاب الاخطار
من قبل لا يسأل على ويش وش فيه

ايترجم اقواله فعل موب غدار
يوم(ن) ولد اللاش حده حكاويه

الصّارم الدّرباس عبّاس مغوار
تكرم عن دروب النذاله مواطيه

الهنشل السرحان الاخطل ذرى الجار
لا واهني من كان يسكن حواليه

لربعه الويلان الوافي البار
ولا شوهت دورات الايام ماظيه

يغنيك عن ما جاك في موجز اخبار
السّاري السّاري أبو نوت يا هيه

يفرح ل جاه الظيف وتشع الانوار
للخير والمعروف مكثر أياديه

عن حاجة المحتاج ما قدم اعذار
واللي زبن شرواه تبشر هقاويه

أقولها في سر واجهر بها جهار
حامد خويي و أفتخر فيه واغليه

يا عل من مثله طويلين الاعمار
اللي على نهجه وتمشي مماشيه

هذا وانا من هبس واحب الاحرار
رغم انعزالي جنب من هبس انا إيه

رغم الشقى والظلم وسموم الاغوار
ورغم الظروف وكيد الاذناب معليه

خلف الهدوء ايعيش من مبطي اعصار
لا ثار ما يرحم وهاذي مواريه

ماهوب انا اللي يتقي خلف الاعذار
وماهوب انا اللي يقول للكلب يا بيه

لي هاجسٍ لا من شلع جاب الابكار
عذب الصور وابداع محد (ن) يجاريه

ايفج صدر الغيم ويسوق الامطار
يروي ضمى شعور (ن) من العام جافيه

امبروز الصورة والابداع الافكار
واصدق أحاسيس القصيد ومأسيه

يا هبس انا من هبس افا مالي انصار
والصدر كاتم به عتاب ومشاريه

لا بد ما الايام تكشف لي اسرار
وبالساعه اللي احتجت كم غابت وجيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر