أهل المهار أهل السيوف المحنات - سفر مشعان الغبيوي

أبدا بذكر الله عليم الخفيات
الواحد المعبود رب العبادي

رزاقنا الوهاب في كل الأوقات
عليه متوكل عليه أعتمادي

من بعد ذكر الله نقدم تحيات
لبن الكرام اليوم وقت العيادي

عيدك امبارك كل عيد وسعادات
وعيدك سعيدٍ يا فهد بأزديادي

ياراعي الفزعات زبن المخلات
يامزبن الجالين سقم المعادي

يالليث يالضرغام راع الجمالات
ياوافي الأشبار علمٍ وكادي

ناصيك أنا من بد الأجواد بالذات
حيثك لبيب وتفتهم للمنادي

فاهم بحال الناس راعي امروات
عندك عزم وتقودها ماتقادي

فوق النجم منزلك بين الثريات
عالٍ مكانك للبشر فوق بادي

منزال ماجالك بدعمٍ وفزعات
أخذتها بذراع وزود أجتهادي

أخذتها بالعلم وصبر السنوات
ماقدمت لك بالبساطه تهادي

منزال لاق بنازله بالطويلات
جعله ذخر لمسرجين الجوادي

الهاجري مشبع سباعٍ امجيعات
لاجا نهار فيه قدح الزنادي

أهل المهار أهل السيوف المحنات
كم رأس شيخ طوحوبه عنادي

أهل الوفا وأهل الصخا والكرامات
عاداتهم بالجود من عصر عادي

من زارهم يلقى السعد والبشاشات
يلقى وجيهٍ تبتسم له تنادي

بأيمانهم يعطون وقت المجاعات
والجار علّو منزله بالشدادي

ون جالهم طلاب حاجه وغايات
لبّو مطاليبه عطوه الثنادي

وأمسا هنيّ النفس عقب المرارات
وأطعم لذيذ العيش عقب النكادي

وأرتاح باله زاح عنه الثقيلات
والجفن عقب السهر ذاق الرقادي

وأنته يابو ناصر زعيم المهمات
يامسندي فيك الأمل وأعتقادي

ماخاب من ينصاك وقت الصعيبات
واليوم أنا بالنقل غاية مرادي

وختامها مني تحيه امثنات
بالورد والريحان مع ريح كادي

وصلاة ربي عد نجم السماوات
واعداد ماطارت سروب الجرادي

على نبي الله شفيع البريات
في يوم حشر الخلق عريا الجسادي

© 2024 - موقع الشعر