اليا طرالي زمانن فايتن ماضي
قامت عيوني ماغير تهل عبرتها
اون ونة سجين حاكمه قاضي
حزين ويجاوب الورقا بونتها
على زمانن تعدى وراح ياراضي
اهل بيوت الشعر وطول شدتها
اهل بيوتن طويلة رفاف وعراضي
ماتمل منها الطراقي كل ماجتها
مزن الحيا كل ماجاله تنضناضي
الديره اللي سقاهاالغيث وصلتها
تاخذ مع الريف مرباعن ومقياضي
يازين هكا الفياض وريح عشبتها
واليوم طيرالعنى يكفخ على الفاضي
يبى يتصيد ولا يشوف صيدتها
كم واحدن من زمانه مونسن شاضي
ساكت وكنه على حامي مليلتها
مع مومسن خاطره وناره تلاضي
وظروفه الناس ماتعلم سريرتها
المزري اللي يبى ينوض مناضي
معاد يقدر على الروحه وجيتها
ياحسين ولم دلالي واجمع اغراضي
وحطها بالبدي ولا غمارتها
على اللي ليا مشى جاله تنهاضي
خلى العراوي على الجره بعجتها
اللي تناقز مثل مناقز رياضي
ماتلحق الجمس لو تصفي مكينتها
اي والله اباخذ مع البر مركاضي
اظن صدري عنه تروح ضيقتها
وان كان شفت الحباري درج ورباضي
اللي عن الطاير تدرق بقشعتها
يروح عني غيضي لو كنت مغتاضي
والنفس عقب الزعل تصير فرحتها
الشاعر:مخلف حسين بن صعيب المطيري
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.