أمي ياعين الطير

واهني اللي ماشكى فراق أمه
اللي ضمن جنات تحت القدامي

مرتاح باله ماعرف شكل همّه
ولا عرف من وين ضيم وسقامي

خالي من الأحزان وكبت المغمّه
وخالي من الضيقات وقلبٍ حطامي

تشوف زوله بس تزول المطمّه
وتبوس كفّه تذوق حلو المرامي

تفك ريق القلب بصوته وتشمّه
وتحلى أوقات اليوم بجلسة ومقامي

الأم الأخت والزوجة بالأهل مهتمّه
ودّك تسكّنهم فوق هام العمامي

حبايب وخفوق القلب وعرقه ودمّه
حبايب وجزل المدح ماتحصي القلامي

وإلا الذي سمّوه خاله وخمّه
وجدي بسيل قشاش مثل السونامي

وإلا تخرس لسان وتسدّ له فمّه
وتكتب عليه الخبث شعاره هدامي

وإلا بعد ودّك تذبّه بمقمّه
وتدفن بقايا أشلاه وتذبح نعامي

غلّ حقد حسد وحصيلة مذمه
تذم خلفت أخت بكثر الملامي

ولا أعمّ البوح بذمّ وملمّه
منهم من طيبه تجاوز كوامي

الطيب لأهل الطيب سلوم تعمّه
همّه يطيب الطيب وطيبه دوامي

وإلا الذي طيبه يحسبه مرمّه
يصبح ردي الطبع ورداته ركامي

الطيب شبه الطير بطبعك تخمّه
طير بخمس الكف وطيرٍ حوامي

أمي ياعين الطير وتاجي ومعمّه
ياذرى وظل العز وحسن الكلامي

أمي ياشمس العمر وبدر ومتمّه
ياضي دمس الليل وفجر الظلامي

بدري عليك القول حنيني أضمّه
الحنّ حنين الأم وغيره عدامي

عساك بطول العمر وصحة تزمّه
عسى السعد يلفاك وحلو المنامي

عساك بعد العمر بجنة تلمّه
تلم خضر أجنان بخلد وسلامي