مل الورق

مل الورق من مصافح حبر الأقلامي
من كثر مااكتب على الأوراق وامزعها

لين استوى خطَها غصب من الهامي
لا استصعبت في معانيها نطوعها

قالوا اليا ضاق صدرك سج الأقدامي
ساير همومك ونفسك لا تطاوعها

وسجيت رجلي مع البيدا من العامي
ولازالت النفس تشكي من مواجعها

جفني اليا ناموا العربان مانامي
روابعٍ تصطفق فالبال واردعها

الحظ الأقشر اليامن طاح ماقامي
ولا غير ربك اليا ضاقت يوسعها

والعمر لو زانت أيامه فلا دامي
ولا فاتت أيام عمرك ماترجعها

ومن عاش دنياه ضايع بين الأوهامي
تالي حياته مع العالم يرقعها

ومن لا اتعب النفس في تحقيق الأحلامي
يندم اليا فاتت الفرصة وضيعها

ومن لا تعلم من الدنيا والأيامي
تكثر عليه المشاكل مايسنعها

يقطعك دنيا تعلَت فيها الأغزامي
من الطغى ماتكلم غير بصبعها

من عقب ماهم صعاليكٍ وخدامي
قامت تهقوى على العليا وتطلعها

من كثر ماله غدا للقوم مقدامي
حتى ولو ثروته بالسرق جمعها

جتله علومِ وهو مايسقي الضامي
لو في يده لقمة المسكين ينزعها

عشنا وشفنا الطغى من كثر الأنعامي
في عالم ٍغيرت حتى طبايعها

لاهين في امتابع الموضه والأفلامي
لين المره طوَحت بالسوق ملفعها

قامت تخصر تقل تمشي على انغامي
ماحصلت نادرٍ بالوجه يصفعها

ولا زالت اهدافها تدرس لقدامي
ماتنتهي لين هامتنا تخضعها

ان كان في ذالبلد قرمٍ وضرغامي
والله ليبطي على الكرسي تربعها

وان كان مافيه لا قرمٍ ولااغلامي
ماهي حسوفه اليا نالت مطامعها

ولا اعم كل العذارى فيهن احشامي
من يوم لدوا لها ماشيف مفرعها

هذا ولاني على العالم بعلامي
شيٍ تشوفه عيوني من دوافعها

وصلوا على المصطفى رسول الأسلامي
اعداد ما صلت الجمعة جوامعها