زمان الطفوله - سعود ردعان الهاجري

الله اكبر يا زمان الطفوله
أحلا زمانٍ مرني في حياتي

من زود شوقي قمت اساير ميوله
حتى وصلت لشارع الذكرياتي

وقفت اطالع به ونفسي خجوله
والعبره القشرا لجت في لهاتي

أخذت في ذيك الممرات جوله
اروح وارجع والتفت في إسكاتي

هذاك مقعدنا وهذي ادلوله
وهناك ملعبنا بذيك الفلاتي

وهذاك دكانٍ له الكل يوله
عقب الغدا فيه انتجمع زتاتي

في طوفته والا حواليه حوله
يمكن بقايا احروفنا بيناتي

واليا تجمعنا مشينا حموله
لاهين ما ندري عن المقبلاتي

هذاك حافي ضايعاتٍ نعوله
وهذا عليه هدومه معفساتي

وهذا يتفاخر قدم ربعه بزوله
وهذا يعاندنا بحذف الحصاتي

ومن فاز منا ربعنا صفقوله
تقول كنه كاسبٍ له غناتي

محدٍ يحاسبنا عن اللي نقوله
جهال نلعب بالخطر مانحاتي

واليا تزاعلنا رضينا بسهوله
ما همّنا إلا لعبنا والمباتي

فريجنا كله بعرضه وطوله
كله نعرفه من عيال وبناتي

وقفت فكري حاير من ذهوله
عطشان لأيامٍ لنا ماضياتي

والله يلولا اللوم لأنسى الرجوله
واني لخط الملعبة في عصاتي

واني لنادي كل ربع الطفوله
يمكن انهم حنوا لذيك الحياتي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر