يازين ضحّيت

يازين ضحّيت لك وارخصت لك روحي
والظاهر ان تضحياتي مانت شايفها

عليك جاوبت نوح الورق في نوحي
والعين حرّق خدودي حرّ ذارفها

ياعلّتي ويادوايه داوي جروحي
سبايب جروح قلبي وانت عارفها

مما حصل لامباح ولانت مسموحي
عذّبت نفسي عسى الله منك ينصفها

يكفيك عن حب غيرك مبعد شبوحي
كل من بغتني على شانك اطوفها

مهيمنه بالغلا لاابصر ولااوحي
معمي عيوني عن العالم ومحرفها

مع كل هذا بوصالك صاير شحوحي
بخلت في وردة البستان لااقطفها

قلي من الحب هذا ويش مصلوحي
لاصار ماتترك النفس بتصرّفها