انت القمر

الشعرنكتبْه ويداوي مواجعنا
كم شاعرٍطول عمره جرح واوجاعي

يابسمة العمر يامتعة مرابعنا
أملّت فيك الأمل حاشاك ماضاعي

يوم ان بعض العرب سافر ماودّعنا
جيتي كما غيمةهلّت على القاعي

اهواك ،احبك ، وش الليّ عنْك يردعنا ؟
الشيب ماهو لاهل الحب ردّاعي

نمشي الهوينا واذا اسرعتي اسرعنا
اطباعكم وافقت ياعمري اطباعي

صحيح قبلك هوى ياحيف مزّعنا
يلعب بنا كنّنا سبحه بالاصباعي

آمر ولا تنتظر ياصاحبي(طعنا )
القلب مفتوح لك مع كل مصراعي

ريحانة القلب واهتزي تري مُعنا
جليد ماهوجبل من شمسكم ماعي

ياما انتظرنا الذي يرمع موانعنا
ويجاري البوح واثرك حيل رمّاعي

يفداك من رغبته طمعان يجدعنا
مايعجبه وضعنا من كل الاوضاعي

ويفداك من كان يمضغنا ويجرعنا
طاغي على كلّ حاله بالحسد طاغي

يوم انّنا ماصبرنا صار يتبعنا
ومن اول سياسته يلوي لي ذراعي

الحبّ راعيه مااظنّه يجرّعنّا
باعذاره الواهيه به سمّ الافاعي

أحيان نبكي ليا ما الياس يصرعنا
واحيان يبكي نفاق وكذب وخداعي

خلاص مابيه والا ابيه تمنعنا
وابشرلك الروح يارجواي تنصاعي

اجمع على الليّ تبي واطرح وقطّعنا
واضرب بنا بسّ لاتقسم لطمّاعي

انت(القمر) كان بالاشعار أبدعنا
من شان عينيك كلّ الشّعر وابداعي

وانت الغلا شاعرْك باللفظ والمعنى
يكتب لك من القصايد ماهي ارباعي

ابيات لو قلت ابا ابداها تمانعنا
ولوقلت ابا انهي القصيده ماش مطلاعي

سحابة(ن) يوم تنشي فوق تسمعنا
هزيمها بارقه من قبْل لمّاعي

الشّعر عندي مثل هلة مدامعنا
ماتنحبس له من الاعماق رفّاعي

والشّعر عندي أساور خذ وطالعنا
يكفين منْك الرضا وعيونك تراعي

صحيح لو جيت ادور داركم ضعنا
بيني وبينك فجاج طوال ووساعي

بعيده الدار لكن لك يشجّعنا
قلب ٍ تضمه حنون ٍ جاذب ٍواعي

تستاهل اغليك والغي كلّ من معنا
مادام قلبه يحبّن حب ٍصناعي

تعال حاول بعد روحي تروّعنا
انا اتحدّاك من عينيك ماارتاعي