اللحون الشجيه

جاني جوابك يابعد كل غالي
ومن القهر كسرت مافي يديّه

خذيت ادوِّج بالفيافي لحالي
واجر صوتي باللحون الشجيّه

من سبة اللي صار بآخر مقالي
إنك على ماقلت تشره عليّه

والله ماتدري وش اللي فبالي
لو كان تدري ماقسى الظن فيّه

أنتي ترى في دنيتي ماصفالي
لك في حياتي قصةٍ سرمديّه

لك منزلٍ في داخل القلب عالي
ورياض خضرا قفرةٍ شاعريّه

ماهو على ماقيل حبٍ خيالي
شوفي غلاك بداخلي نار حيّه

والله ثم والله مالك بدالي
وانا بعد مالي بغيرك بنيّه