الكثرة تغلب الشجاعه - مسفر جمعان الصفا

شفت لي منظر وايقنت بان الاجتماع
فيه لاصحاب النواميس طيب وْ مفخره

حتى ما بين الاسود الضواري والسباع
من يفارقها معادينه اتفج انحره

الاسد لاصار وحده تناهشه الضباع
تاخذ صيده من يدينه بغصب وتقهره

والله لو انه ملك غابه وْ قلبه شجاع
ويمتلك هيبه وقوّه وعز وْ مقدره

ان تذلّه لين يصبح فريسه للجياع
ومن زيادة خوفه ايلوذ عنها بشجره

هكذا حال الاسد حينما اشتد الصراع
اصبح من بعد الزعامه يحزّن منظره

والحقيقه وجهها ما يغطّى بالقناع
واقعٍ ما احدٍ جهل به ولا احدٍ ينكره

الرجل لا شذّ عن ربعه الادنين ضاع
يرخص في عيون الاعادي وكلٍ يحقره

كم شجيعٍ اصبح اسير بيدين الرعاع
الوحيد ايهون باسه لا جاءْ بين عْشره

تغلب الكثره شجاعة طويلين الذراع
اليد الوحده في الضيق ما فيها ثْمره

والكفو مع ابن عمّه الى اشتد النزاع
اما يوقف معه بالحال والا ينصره

والردي ما فيه غير الضعافه والخداع
يضحك في وجهه والى غاب يطعن فظْهره

وانت ياراع النواميس ياجزل الطباع
ابن عمّك مكسبك لا تحاول تخسره

وقبله ترى خوك يشرى وداده ما يباع
خوك سيفٍ في وجيه الاعادي تشهره

وْ لا تجنّب جال ربعك لو انك ما تطاع
انتبه ثم انتبه صفهم لا تشقره

التزم بالصبر والصمت قدر المستطاع
لا تسمّع ناقلين الحكي والثرثره

وْ لا تحاول تلتقط حبةٍ من كل صاع
راعي النمّه الى جابها لا تشكره

وعن خطا ربعك تجاوز بطيبه واقتناع
واعرف ان الصفح والعفو عند المقدره

حتى لو الوضع ياصل الى لوي الذراع
لا تشب النار بين الغصون المثمره

لا تصير انت السبب في مراسيم الوداع
واقبل الراي المعارض ولا تستحقره

وْ لا تغيّب كل ما قيل لك فيه اجتماع
خلك اول من يجي فالمقام وْ يحضره

لا تسوي مثل من لا يجي لا جاه داع
الا في وقت العزاء والا عند المقبره

والصلاه اعداد ما ناض براقٍ وشاع
على من حارب هل الشرك والدين نْشره

والله يجمعنا على الخير في كل البقاع
ونطلب منه العفو والمرحمه والمغفره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر