ياهنوف قابلتني كاشفة - خالد بن عبدالعزيز التميمي

ياهنوف قابلتني كاشفة
من تعرضها مصيره للهلاك

كنها في وسط عيني واقفه
طالعتني قلت ياخالد عناك

ارتبكت وطحت قالت آسفه
ياغشيم بالهوى ماذا دهاك

قمت وارجولي تراقص راجفه
ماقدرت اعبر حدود الارتباك

قالت اعصابك وراها تالفه
وش بلاها خطوتك ترجع وراك

قلت يا اروع جمال شايفه
ماقدرت اشوف من زاهي سناك

سوت اعيونك لقلبي سالفه
فيك احلى عيون يااحلى ملاك

الغلا لادق بابي باصفه
والمشاعر ماتقصر في غلاك

لك وهج عمري جنون العاطفه
لك جموح الروح تركض في هواك

شف ضلوعي واقفه متراصفه
كل ليلة تنتظر حزة لقاك

والمشاعر غير زولك عايفه
ماتبي غيرك ولا تبغي سواك

منزلك عندي براس النايفه
ماحد يازين ياصل مستواك

برسل الاشواق وانتي عارفه
من خفوق بالغلا يملاسماك

ان جتك بالصبح قولي كايفه
وان جتك باليل يسعدلي مساك

خالد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر