اسمها معناه الاحجار الكريمه - مسفر جمعان الصفا

الغنوج اللي بها المعلوق هامي
قلب شاعرها تربع في صميمه

حبها بقلبي وفي داخل عظامي
ترحل الدنيا وهي باقي مقيمه

شوفها بعد البطا غاية مرامي
وهيْ سعادة روح غاليها وْ نعيمه

من غلاها اشوفها انا في منامي
حتى في لاحلام شوفتها غنيمه

نادره ما مثلها بْكل الانامي
تعجز الاشعار عن وصف العظيمه

بالجمال وْبالدلال وْ بالتمامي
من جميلات العرب هي الزعيمه

عيطموسٍ زينها نادر وزامي
باجمل الاوصاف والروح الحليمه

خدها بدرٍ يشعشع فالظلامي
تشرق انواره على الدنيا العتيمه

والثنايا لول من خلف اللثامي
غيمها يمطر على الازهار ديمه

وْ لا هرجت يازين منطوق الكلام
تشفي بْنغماتها قْلوب سقيمه

وان ذكرت انا اسمها ما به ملامي
لان له هيبه ومقدارٍ وقيمه

اسمها تغار منه احلى الاسامي
اسمها معناه الاحجار الكريمه

© 2024 - موقع الشعر