الرجل لامنّه تعدا الثلاثين

الرّجل لامنّه تعدا الثلاثين
ولا شفت له موقف ظَفَر لا تعدّه

حطّه على يسراك لا تحطّه ايمين
لا نافعٍ نفسه ولا من يوده

وْلا كاسبٍ دنيا وَلا كاسبٍ دين
وْلا له فعولٍ فالمواقف مسدّه

عن الرجاله بارد العزم ومهين
وتقصر عن إدروب النواميس يدّه

المرجله ما يفيدها بارد العين
من غايته نومه ولين المخدّه

واللي يحاول يغسل الدين بالدين
مثل الذي يبني بناه وْ يهدّه

واللي ما ترجحْ به جميع الموازين
لايفتخر في طيب خاله وجدّه

ان قال هم وافين نقول وافين
لكن هوْ من بعدهم خاب كدّه

الرجل من يصبر على العسر واللين
ولا تبيّح اصروف المقادير سدّه

والرجل من فعله يهز الميادين
حرٍ ينومس فالقنص من يهدّه

له هيبةٍ تكسر قلوب المعادين
ولا عدّوا الابطال كلٍ يعدّه

رجاله وْ دين وْ شهامه وتمكين
وفي حزة الفزعات ما فيه قدّه

هذاي حقايق واضحه بالبراهين
ومْن التجارب نورها تستمد