سدرة الملتقى

يالذة العاشقين وْ ياعنا العاشقين
ما عاد بعد الغرام اللي بقلبي غرام

حبك بقلبي تمكن من قديم السنين
دخلت في عالم العشاق وانا غلام

من سدرة الملتقى بدا الغلا والحنين
ولا اليوم ما جفّت انهار الغلا والغرام

اشل حبك بمكنوني وجرحي مكين
عشقٍ خيالي تعدى عن ثلاثين عام

وقت الصحا اتخيلك يالغاليه كل حين
وفي نومي احلم بشوف في لذيذ المنام

من يشبهك بالدلع يازهرة الياسمين
وانتي جمعتي هوى الشاعر وعطر الكلام

فيك الجمال الفريد اللي زهى بكل عين
عن كاملات الحلا وحدك خذيتي وسام

وانا اعشقك فوق ما فالحب تتصورين
حبك سطى فالخفوق وْ في صميم العظام

وان كان ما عاد يكفي ذالغلا وش تبين
لا تلحقيني فديتك يا حياتي ملام

لكن باقول لك كلمه وباقسم يمين
ان حب كل العذارا بعد حبك حرام