اغلق ابواب التفاهم - مسفر جمعان الصفا

الصحيب الغالي اللي هدم بيده غلاه
خاب ظني فيه وانا احسب انه ما يخيب

صد واعلن صدته من خلاه وْ في خلاه
ما كشف سر الخطا جعل شمسه ما تغيب

اغلق ابواب التواصل ولا ادري وش بلاه
وْ لا بغيت اكلمه ما يرد وْ لا يجيب

حذف الوتساب واعلن مع الصدّه جفاه
وبدّل الوجه الرضي لي بالوجه الغضيب

ليتني ما ابديت سر السنين اللي خفاه
وْ لا شرحت لْه الحقيقه من الصدر الرحيب

كم لي اداري مشاعره واجزع عن خطاه
وْ ما حسبته تالي الوقت يصبح لي حريب

لكن لو اخطا عليّه عسى الدنيا فداه
غاليٍ عندي ولا يلحقه شكٍ وريب

باتجاوز عن خطاياه واسعى في رضاه
وان طلبني حق باعطيه انا الحق المصيب

© 2024 - موقع الشعر