منك السموحة!

منك السموحة! لو حصل مني غياب
ابى اعتذر ياصاحبي؛ دام خطَّيت

أرضي عتابك وان زعل مني اصحاب
من شانهم (ما يوم عنهم تقفَّيت)

دونك غلاتي ما تحلا بها اقراب
انت الوحيد اللي بغلاتي تحلَّيت

لعيونك اشقى، وافدي لوصلها احباب
وآمد لك حبل الرضا لو تعنَّيت

ماني بحاسب فالهوى لغيرك حساب
ب(الذوق) عن غيرك فرقت، وتسمَّيت

يالخاطر اللي بادل الخاطر عجاب
ياما على شانك عن الناس سجَّيت

يمك سرجت الشوق، وافكاري ركاب
من وين ما ودَّت خطاويك- ودَّيت

لك بالحشا قلبٍ من الحب ما تاب
على عروشه يا (غناتي) تعلَّيت

ماني بغايب! والعتب ما له اسباب
غير (الدلع)؛ يومك عليَّا تبلَّيت

واكبر دليلي: لو غفت عنك الاهداب
موعد لقانا -حلمك اللي تمنَّيت

ش/ طلال عويض مصري الضريسي الهجلة المطيري