مرثية في الوالدة الله يسكنها الجنة

لـ مشعل مبارك ال شامر، ، في الرثاء، 92، آخر تحديث

مرثية في الوالدة الله يسكنها الجنة - مشعل مبارك ال شامر

ياالله يالي ترزق الحي والمِيت
ياواحدن علام حال البريه

ادعيك وارجي رحمتك لاتوضيت
وارجي ثوابك كل صبح وعشيه

ياالله جنبنا جميع الطواغيت
وعزنا بادين والمقدريه

ياالله ثبتنا على الحق تثبيت
وبالصبر ثبتنا وباعد خطيه

الله يسامح كل ونه وتنهيت
خلت ضلوع الصدر نارن لضيه

ياحر صدري لاتذكرت واطريت
امي عساها فالجنان الرضيه

امنيتي شوفش ليا من تمنيت
الشوق في قلبي وقد نار حيه

اثر الحياه احزان والموت تشتيت
الله يجمع كل حين بحيه

دايم ليامن غبت ساعه ولاجيت
الحزن في عينش يجمع سويه

لاضاق صدري رحت ادورش فالبيت
عشان اشوفش يالحياه الهنيه

واليوم لامن ضقت ثم جيت للبيت
يهل دمع العين غصبن عليه

شليت حزنن فوق قلبي وحطيت
وكنيت عبرات الزمان القويه

عروق الحزن شابت وانا ماتوعيت
وحدت ضلوعي باسيوف الرهيه

هليت دمعي واحسبني تشاليت
وأثر الحزن عينه علينا مليه

لاقلت بسلى ذقت ون وتناهيت
ودموع عيني فوق خدي جريه

عانيت ياصدري من الحزن عانيت
حزنن يحطمله جبالن رسيه

ياحزن ليتك مع خفوقي تماليت
طويت حالي طيتن فوق طيه

راحت وانا من عقبها ماتهنيت
ابكي على ذيك اليالي الخليه

يانوم كم لك من عيوني ماطبيت
تحدني صوب السهر والمنيه.

الفقد موجع فالصدر يحيي يميت
للي سواتي ذاق كيه و كيه

ياموت ليتك عن قضاها تعديت
وروحي بدلها تستلفها هديه

جاها القضا من دون موعد وتوقيت
وتحت الثرا دفنت سنينن مديه

يا الله يامحيي العظام المفاتيت
ياخالقن جنات عدنن عليه

اغفرلها وانبت لها الروض تنبيت
ونور لها ظلم الحود العتيه

وأمدد لها فالقبر ياخير ماعطيت
واسق القبر بالغيث روحه وجيه

ويالله بأمرك دودة الأرض ماتبيت
على جسدها فالسنين المديه

وجعل لها بين النبي قصرن وبيت
وفالجنه تعيش الحياه الهنيه

واجبر عزانا واهدنا خير ماهديت
وبدل لها السيات سيه وسيه

وصلاة ربي عد من حج فالبيت
وعداد حبات النبات النديه

على الذي ثبت لنا الدين تثبيت
محمد رسول الله وخاتم نبيه

مشعل مبارك ال شامر
© 2024 - موقع الشعر