يالله بنوٍ ثقيلن يرزم ارزامي
منشاه من قبلةٍ خيره سبق شره
ماهوب لا مغرق ولا هوب هدامي
ولا هو من اللي يجي مايدفن الجره
تسوقه الريح في ممشاه قدامي
يغطي الشمس لو الشمس محمره
كن في مقاديمه سنون وتبسامي
ثمان غروٍ معاه النفس منغره
في ضحكته ياعرب ماني بمنلامي
لا زدت بالوصف يمكن تلحقه ضره
وكن في مواخيره دموع وتلطامي
لطمٍ على الصدر ودموعٍ من الحره
على يتيمن تنزح من هل الشامي
والا الفلسطيني مثل محمد الدره
ولا سيّل القاع قالو يروي الضامي
يسمع به اللي سكن ف ابقيق والحره
عساه يروي القبور اللي لها اعوامي
ويحوف قبر الكريم اللي هنا مقره
من مات جعله في جناتن وانعامي
ومن عاش بيعيش في دنياه بس مره
كم ميّتٍ يذكرونه عبر الايامي
وكم واحدٍ حي مو مذكور بالمره
ولا تبقى إلا المكارم عند الاكرامي
والطيب من يفعله مردوده يسره
نعيش لله في منهاج الاسلامي
وماهمنا الموت لو ياتي على غره

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر