على سكة أمل - دلان بن مساعد

على سكة أمل يا حظنا نمشي ولكن وين ؟.
على الله والخطاوي بين ماموره و منهيه

صواديف الزمان الغابره تحكم على السارين
بان الوقت له قدره ووجهي ساق جاهيه

على وجه الرجال اللي لهم ميثاق حق ودين
عسى الطيب يعيش وحاجته فالوقت مقضيه

نعرف الطيب وَالطَّيِّب على عسر الزمن و اللين
يمينه مثل هداج العرب لو يملك شويه

احب الطيبين اللي تحدتهم ظروف البين
و لا ضاقت خواطرهم مادام قلوبهم حيه

واحب اللي يهييب مايهاب ويقسم الصفين
شجاع وسيف حقن له مع اهل الطيب ماريه

واحب الصادق اللي كلمته تقطع كما السكين
على الميزان يرجح ماختلف ظنه على النيه

مصير الوقت يكشف كل حاجه والعلوم تبين
مادام انّا ودايع فالزمن و اجسامنا ديه

واعرف ان الوفي يبقى وفي لو باروا الادنين
واعرف ان الردي يلعب وله حاجات ملويه

ياليت ان الردى وجهن نشوفه واضحن بالعين
على شان انتجنب خوته لاثارة الهيه

وياليت ان الكرم رجلن ليا ضاق الزمان ايبين
يفك العسره اللي دونها سيف ن و جنبيه

و ياليتنا عرفنا ..! او جهلنا رحلة السارين
و على سود الليالي جبتها و زنن و قافيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر