علاقات الحسود

‏الناس يختلفون والاغلبيّه
على نظام (حظوظنا وهّقنّا)

أما ثقه عميا على طيب نيّه
والا قضية (فعلنا يوم كنّا)

مايحمي القانون ناسٍ غبيّه
من طش نفسه لايقوم يتمنّا

احذر تضحى قبل عيد الضحيّه
واحذر ورا صكات بقعا تعنّا

واللي مصابه من غشامة خويّه
ماينفعه ترديد (فينا ومنّا)

لو طير ابن برمان ماجاب حيّه
ماصار مضرب للمثل في زمنّا

ترا علاقات الحسود اجنبيه
لو كان ماعمره تعدا وطنّا

لاشاف عندك طاقه ومعنويّه
والناس قامت في مديحك تغنّا

حط المصيبه في غلاف الهديه
وارسل عليك يقول جعلك تهنّا

والا بعد صكك بعينٍ قويه
واصبحت عقب الاستقامه تحنّا

راع الحسد بالناس ماشفت زيّه
عده لمشروع اليهود ايتبنّا

لاجاك لو تستقبله بالتحيّه
وتقول غبت اسبوع وابطيت عنّا

قابل كرمك بفكرةٍ نخوليّه
يقول هذا غثّنا وامتحنّا

ودك تعدي فيه قمّة طميّه
وتقول فيه فروخ صقر اعجبنّا

وتنزّله وتعيد نفس القضيّه
يامقيط هذا ارشاك جاك يتثنّا