هذا الزمان

هذا الزمان اللي كثيره بلاويه
اللي به المعروف يطلع جريمه

ليا زارك اللي زاوي زاويه
عليه من غبر الليالي وسيمه

ياصلك في بيتك يبوسٍٍ لواحيه
الين عظامه من نقيض الجميمه

يبيك تقضي لزومٍ موازيه
موقف عليه اللي يتل الشكيمه

وطلبت عون اللي نخافه ونرجيه
رحمن رجوى مد غيره هزيمه

وفضيت جيبك ماليٍ له مخابيه
شيمة عرب . مانته مدور غنيمه

علي اللزوم اللي يخصك مبديه
فل الحجاج . وذب ذيك الخريمه

واليا خذيت سنين وانته تراجيه
ماجاك جيته والجوارح سليمه

عنيت يمه مستحي حاسبٍ فيه
لكن ماعند اسود الوجه شيمه

اليا سمعك بطيب اسمه تناديه
جابهك بالعليا ورمحه وريمه

كنك تبي تبلاه والله معافيه
لكن ماتمشي عليه الظليمه

يصيح ويحط الشواهد بذانيه
والله ذكر في سيرةٍ مستقيمه

من زل حرف من الشريعه مخليه
علي هذاك الحرف عض النديمه

تاره يقول ان الخطا صاب راميه
وتاره تقول الطيب باس وعزيمه

وجه الندا مايقدر العذر راعيه
واردها لاهل العقول الفهيمه

اللي يعرفون الندا كيف ناديه
ويقدرون لطقة الباب قيمه

اقولها من هاجسٍ مانيب كاميه
صبرت لين انه طرحني هشيمه

عمري يردن الثلاثين ماضيه
شاركت ابو تسعين قومه وسيمه