سلام ياللي رفيعات ٍ منازيله
من روس قوم ٍ رفيعات ٍ منازلها
توارث المجد من جيل ٍ ليا جيله
المجد من لاهله يعرف من على اولها
وان قيل منهو نقول اللي مفاعيله
أكثر هل المملكه بالفضل شاملها
سلطان واللي حداه الوقت يلجي له
شخصية ٍ من حداه الوقت راحلها
وشرح سبب جيّته وشهو ووشهيله
قدّام أمير ٍ يقطّع له جنازلها
بالوقفه اللي بعون الله تنهي له
دعواه ماعاد يشكي من غلايلها
بيته عن الناس ماسكّر مداخيله
بوابته فاتحه مايوم قفّلها
ماكل امير ٍ يبا ياصل مواصيله
اسم الاماره تليق اله ويليق الها
شيخ ٍ تورده قبايل نجد وتجيله
من كل ديره تجي وأنهى مشاكلها
يصلح بجاهه ودفع المال يصخي له
يمنى الكرم فالعرب بانت جمايلها
الجود بيّن بدمّه من تحاليله
يمنى الكرم والوفا تعرف فصايلها
جوده كما النو لا هلّت هماليله
أسبوع والأرض ماتاقف مسايلها
أدلت ثعوله وعقّب له ورفّيله
يحكمة اللي له الكعبه نقبّلها
نرجيه عفوه ونخضع له ونشكي له
ذنوبنا نطلبه عنّا يحولها
وبعد الله أرجى وللموضوع تكميله
قصيدتي في ابونايف ودي أكملها
الشعر في حضرته تصلح تماثيله
تليق فيه المدايح من مثايلها
ياأمير يامسند اللي بايد ٍ حيله
دنياه ماعاد اله حيل يتحملها
اسباب موضوع أبا أشرح عن تفاصيله
في كلمتين أشرح أسبابه وأفصلها
طلب وجا واحد ٍ رايه بقا تيله
عقده وتحتاج حلحيل ٍ يحلحلها
وأقفى بعد عرقله وأحكم عراقيله
دس المفاتيح والبيبان قفلها
أمر ٍ من الله وقعنا في محابيله
وحلول دعواي ماني قادر آصلها
ولاعاد ألي حل أشوفه قدم وأمشي له
الا ّ جهودك لعلّك معي تبذلها
قل تم والأمر عند الرب تسهيله
اليا ابذلت جهدك كريم الوجه سهّلها
أنته ذرى اللي من الدنيا شكى ويله
ملجا النشامى وفي ظلّك تظللها
سلطان والطيب تنهل من مناهيله
والصعبه إن جات قدّامك تذللها
ماينّخي فاللزوم الا ّ رياجيله
سلطان لاصعبت الدعوى يقوم الها
الأمر لاصعب معروفه حلاحيله
مثل ابو نايف لا صعبت يحلحلها
حلحيل بالمعرفه حكيم بالحيله
تلجي له الناس لا ضاعت وسايلها
دليلة اللي غدا وأفخت دواليله
فالليله اللي غدو فيها دلايلها
راس ٍ سوات الجبل والصعب ترسيله
كم صعبة ٍ لاومرك الله رسيت الها
ثم انتهت واهلها سلطان تدعيله
بالخير لأنك فعول الخير تفعلها
وأنا انتظر منك رد الفعل وارجيله
يالله عسى وقفتك حظّي يحصّلها
وقفتك تنهى هموم الوقت وتزيله
ماقبلها من هموم الله يبدّلها
حتى الفرح يمّنا يبعث مراسيله
نفرح بالافراح ونقبّل رسايلها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين