في خادم الحرمين الشريفين الملك فهد - سبتي بن حمود العضياني

يالله ياللي نطلبك كل ساعه
ولطاعتك ندعي سجود ٍوركّاع

يارازق الداب العمى في ظلاعه
صخّرت له طير السما بعد ماجاع

تحفظ زعيم ٍ طال شبره وباعه
اللي حما الاسلام من كل خدّاع

صان البلاد بطيب راي وشجاعه
من خوف لايطمع بها كل طمّاع

فهد الفهود اللي طويل ٍ ذراعه
حاكم حكيم ودارس ٍ كل الاوضاع

داره حفظها عن دروب الضياعه
بينه وبين الدار عهد ٍ ولاضاع

عاهد وعاهدته وصان الوداعه
وخلّى لها مع مطلع النور مطلاع

طوّر مشاريع البنا والزراعه
نبت الزهر لو هو على يابس القاع

بنى لها صرح ٍ بعيد ارتفاعه
ووفّر لها الخيرات من كل الانواع

لين السّعد والعز رفرف شراعه
وذعذع لها من طيّب الريح ذعذاع

ودعم شعوب ٍ ذابحتها المجاعه
قلوب مفجوعه من الجوع ووجاع

والله مايقصد وراها طماعه
الاّ لوجه اللي لداعيه سمّاع

فيك الشهامه والكرم والقناعه
ياما أنفقت يمناه في شتّى الاقطاع

ياسيّدي لرضاك سمع ٍ وطاعه
ولاعاش راس ٍ لادعيتوه ماطاع

أنتم حصون الدار وأنتم سباعه
عيال من يمشي على الموت ماتاع

طوّع صحاري نجد من قو ناعه
بسيف لهامات المعادين قطّاع

وخلىّ مقابيس الحرايب جماعه
يوم إنها جمع ٍ على غير جمّاع

لم القلوب وطش ثوب القطاعه
وخلّى رعيّتهم تسرّح بلا راع

ياقو هوماته بعزم وبراعه
من روس حكّام ٍ بعيدين الارماع

من هيبته كم قلب جا فيه راعه
حتى الأسد يزوغ قلبه ويرتاع

صارع زمان الظلم وأطلق نزاعه
خلاّه مثل البدر يطلع له اشعاع

عبدالعزيز بقوّته واندفاعه
طوّع لعز الدين مخطين الأسناع

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر