وثابت على ( مبدى ) !!

المطلبي .. ! حثيت في كل يمه
رجلي واقول ان كل مطرود ملحوق

من راس قمه ، ودي براس قمه
نفسي لها منزال لايق ومرموق

ولا استريح ابدرب يالين اتمه
ان قدر وسلمني الله من العوق

برأس طنخة عز وبنفس همه
صح همتي عليا وصح نظرتي فوق

وبذمتي يا بعض الازوال ذمه
قد الكلام وصادق اولاقدر بوق

والبايق اللي خان بالعرق دمه
لو كان اخوي ابيع خوته بسوق

وفراق من يطلع مع الوقت رمه
عوافي وطيبي معاه اجر مسبوق

ومن خم غيره قلت جعله يخمه
واشرب ورى فرقاه فنجال واروق

انا رجل باللازمه .. والمهمه
واخذ حقوق من العرب وعطي حقوق

وان جيت مثل المزنه المدلهمه
بها بشاير خير ورعود وبروق

وانً رحت حاكم عاش بقلوب الامه
في كل لحظه تنطر اقدومه ابشوق

وترى الهوى مادام راسي يشمه
ثابت على مبدى ولي فن وطروق

( وارد بفضل الله على كل جمه )
واصدر ولو جفت ويبست حلوق