اوراق من الماضي - سلطان العتيبي

يابنت قومي دوري بين الاوراق
ذكرى قديمه تدمع العين منها

وان كان حبك والعشق بعده فراق
لك قصة تحت اللحد في كفنها

ويابنت قولي من طعنها بالاعماق
ومنه مجهزها ومنه دفنها

ومنه لمح دمع امها بين الاحداق
يوم احملو فوق الجرايد بدنها

امن اول عشتي على ضم واعناق
وغنت لك طيور الكناري لحنها

واليوم دمعك من على الخد دفاق
ترزم سحايبها وترعد مزنها

الله حسيبك بعد ماخاطري راق
اشعلتي افكاري ورمحك طعنها

من بعد هكرت المشاعر والاشواق
والروح سلطان العتيبي وزنها

اليوم فرمتي حروفي ولا اطاق
اصبر عن الماضي ولا اجوز عنها

ويالمهره اللي تشتهي ركض وسباق
مع فارس تسحب يدينه رسنها

ماهي خساره لو دفع مهر واسياق
ورما بروحه للخطر واحتنضنها

© 2023 - موقع الشعر