هب نسناس القصيد ولاح برقه في سحابه
وخيلت غر المزون اللي بيوت الشعر ماها
والقصيد أنواع وأشكال ومواضيعه تشابه
وكل كلمة يعرفون أهل المعرفة وش وراها
وشاعر ما يحتمي وقفته ويثمن جوابه
ما يقدم في الرجال اللي رفيع مستواها
الشعر حكمة وأدب ما كل من يبغاه جابه
كون من يفهم بيوت الشعر ويعرف معناها
شاقني شوفة بني عمي مقابيس الحرابة
وزان بدع الشعر وطروق الشعر فيهم تباها
وقلتها وأنا لي أكثر من سنة ما قلت جابه
ويوم جاء ماجوبها بجيبها وأرفع بناها
بيض الله وجه من حط المزاين وأعتنى به
بيض الله وجيه ربع طيبها يسبق رداها
الإبل الهاء عندنا معزة وقدر ومهابه
ما نفرط في عطايا الله ولا ينقص غلاها
وحن هل الإبل من زمان فيه ناخذها كسابه
وننثني من دونها لا كل طماع بغاها
دونها ناطى الخطر والموت الأحمر ما نهابه
بالرهاف اللي تقص العظم لا وقع شباها
أهل فعل وأهل جمع في الملاقاء يندعابه
لابة لامن غزت ماهوب يا قرب مغزاها
آل عرجا لابتي والسيف عزه من نصابه
ولابة المضيوم لامن حده الوقت ونصاها
لابة واحظ من هم له نهار الكون لابه
واهني من لاذ عقب المذلة في حماها
الرجال اللي تعز الضيف وتكرم جنابه
والجبال اللي تذري من تذرى في ذراها
تمت الإضافة بواسطة : بدر العرجاني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر