يالعبد لا تبدي على الناس سدّك

يالعبد لا تِبدي على الناس سدّك
وثق حماية سر خافيك برموز

الحاجه اللي للمذله تحدّك
تنعاف لو بيَّن على حالك العوز

لاتنصى من هو يا نصيته يردّك
في غير غصن اللوز مايثمر اللوز

والحظ لو هو دايم الدوم ضدّك
اصعد على سلّم هزايمْك للفوز

واطلب من اللي يا طلبته يمدّك
منت محدودٍ دون بابه و ملزوز

من صد عنّك جاز صدّه بصدّك
حتى تورّيه المحاقير ويجوز

ترى المهونه قرب من لا يودّك
ضيف ومكانك للمعازيب محجوز

أما الذي وقت اللوازم يسدّك
يسوى عرب ما بَه سوى غزّة البوز