يالله بشوف السيل مع شوفة سهيل ( مجارة لفلاح الشميلي )

يالله بشوف السيل مع شوفة سهيل
يفيض من فيحان للعجرميّه

نبي يالاح البرق مع داجي الليل
نقطع مهاميه الفجوج الخليّه

سجّتك مع شروى الرجال المشاكيل
تجلا الشقى عن كل نفسٍ شقيّه

وشوف الحيا مع شوف نقع الهماليل
يسوى شواطئ ديرتن ساحليّه

واليا حصل طلع ابلجٍ بعد تدهيل
والف عقب ما اتعب بنقله يديّه

لو مانحصّل من ولعنا محاصيل
لنا برجا كل عام روحه وجيّه

ولا مضحّانا على مدرج السيل
يحسب لنا من رحمة الله هديّه

اتلا الضحى تبهيرة البنّ بالهيل
تكفي بقاعٍ سيّلتها برديّه

وختامها ل تزهلك بالمعاميل
تاصلْك مني يالشميلي تحيّه