صاحبي

لـ احمد الردعان، ، في غير مُحدد

صاحبي - احمد الردعان

اه من ضيقٍ عن العالم .. خفا
عاجزه تقفي به إجزال الحروف

من طلوع الشمس لي نجمي غفا
وضيقتي مابين ضلعاني تطوف

ليلةٍ ماهي براد ،، ولا دفا
ماخذه من هذي وهذي .. وصوف

موتري روّح على دار الوفا
دار ربعٍ صيتهم مجْد امعروف

عند منهو لو جفيته ماجفا
عند ابو راشد سعدْ عين الضعوف

كنت اظن أصحابي لْجرحي شفا
وانّ بعْض الظنّ خذلان وزيوف

صاحبٍ يفزع قبل يسمع ب افا
وصاحبٍ ما كنّ له عينٍ تشوف

ودايم اللي لاطعن .. يطعن قفا
نفسه اللي كان ابد مامنْه .. خوف

خافقٍ لا زلّوا احبابه .. عفا
ليت ماهو للعفو دايم شغوف !!

صاحبي وان ضاقت الدنيا ؟ لفى
ماتعذّر بالليالي ، والظروف !

واحدٍ لكن عن الدنيا .. كفا
لاحضر يغني عن اجموع ، وصفوف

سيف حربٍ يختصر .. كل الوفا
ماهو لْ عرضه مثل باقي السيوف !

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر