البارحة كملتي عام

لـ دهن العود، ، في غير مُحدد، آخر تحديث

البارحة كملتي عام - دهن العود

البارحه كملتي عام
يا اغلى من كل الانام

البارحه رحتي بسلام
غبتي وفرحي معك غاب

البارحة سكرت باب
فتحت لهمي الف باب

بكيت من هم وعذاب
وشكيت من طول الغياب

البارحة زاااااد البكا
ولا فيه احدن بك حكا

غير العذاب اللي ارتكا
بوسط قلبي مثل داااب

البارحة كل(ن)هجع
وبقيت وحدي بالوجع

اشكي هموم اللي انفجع
(أمي) غدت تحت التراب

في مثل ليل البارحه
من عام ليله جارحه

اقوم واجلس سارحه
يهل دمعي كالسحاب

بعدك حياتي مهزله
وكل الهدايا مهمله

سنين عمري ممحله
وكل(ن)ذبحني بالعتاب

البارحه حل الوداع
في صدري للفرق نزاع

من بعدها صرت بضياع
كالشمس غاطيها الضباب

ودي اقول بس الحكي
يوقف على شفاهي بكي

ابكي فراقك واشتكي
هم(ن) ثقيل(ن) كالهضاب

البارحة سيطر سواد
على حياتي بلا تواد

نزلت وهمت بكل واد
وضعت في ارض وشعاب

بكيت من فرقا وجروح
واحزان عيت بي تروح

حتى الورق يرفض يبوح
والحبر فوق السطر ذاب

من يوم شديتي الرحال
شمسي على اثرك في زوال

لا تقطعيني من الوصال
ارجوك يكفيني عذاب

من يوم رحتي يا الحنون
غدت حياتي بليا لون

يلفها حزن وسكون
أسود سواد من العقاب

فرقاك من همي تزيد
تهز اركان القصيد

تحول افراحي لجليد
ويطير من قلبي الصواب

تدرين يمه وش ابي ؟؟؟
ودي اجيلك لو حبي

والبي كل ما تطلبي
مير التمني تحت ناب

الحال عقبك في انتكاس
اعيش انا بليا حواس

زاد الحزن بالياس ياس
والهم تناهش كالذياب

ابكي ألم ابكي حزن
تنزل دموعي كالمزن

وعيوني من نومي قزن
حزني صميلي والزهاب

الدار عقبك مظلمه
والحزن حط بها سمه

والياس داسه بقدمه
امسى ينوح به الغراب

ابكي اذا جيت الفراش
انا بدونك .. لا ولاش

احرقني حزني ولا بقاش
غراب يسعى بالخراب

حسيت انا وحدي هنا
بدنيا كبيره بلا هنا

انظم قوافي من العنا
واكتب واثني بالجواب

يا الله تجبر بي عزاي
وتصير في حزني معاي

وترحمني من فرقا غلاي
من يسألك لا ما يخاب

البارحة بحلمي رأيت
أني إلى قبرك سريت

حضنت قبرك ثم بكيت
يا الله تجزيها الثواب

واليوم حققت الحلم
من عام ذابحني الالم

والشوق ظالمني ظلم
والقلب من فرقاها شاب

مشيت يذبحني العويل
من هم واوجاع وهويل

للمقبره سور(ن)طويل
بكيت عنده ودمعي راب

وصلت لك قبل الاخير
قلبي من ضلوعي بيطير

حسيتني لشوفك فقير
يا الله تهون بي المصاب

لقيت نفسي واقفه
قبرك بعيني شايفه

امان ماني خايفه
اللي يحب لا ما يهاب

وقفت ودمعي بانهمار
يبعدني عن قبرك مسار

يفصلني عنك هالجدار
بيني وبينك كالسراب

رفعت يديني لخالقي
دمعي بعيني غارقي

دعيت بقلب(ن)صادقي
يغفر خطاك بلا حساب

يا واحد(ن)فرد(ن)صمد
يا خالق ومحصي العدد

تنجيها من نار الخلود
وتعطيها باليمنى الكتاب

وتسقيها من بعد الظما
شربه هنيه من السما

وتقطف ثمار(ن) به نما
ندعي لها شيب وشباب

تغفر لها ذنب(ن)عظيم
وتبعدها عن نار الجحيم

وترزقها جنات النعيم
تاكل بها ما لذ وطاب

© 2024 - موقع الشعر